EBARUHA ERIKWETOROORA - Okw`ikumi-n`ebiri 2009

“Yesu kristo tahinduka, oku abaire ari nyomwazyo n’eri izooba nikwo ari kandi nikwo ariguma ebiro byoona.” (Abaheburayo 13:8)

EBARUHA ERIKWETOROORA Okw`ikumi-n`ebiri 2009

Endamutsyo zirikurugira kimwe aha mutima ahari imwe mwena omu iziina eririkukirayo omuhendo erya MUKAMA waitu Yesu Kristo n`ekyahandikirwe okuruga omuri Isaaya 46:10:

“Okwiha aha kutandika nkaranga eby`emperu, naiha omu biro bya ira, nindanga ebitakabaireho, Ningira nti, Enaama yangye eryahama, mpikirize ebi naamaririire kukora byona…”

Omurunyiriri oru Ruhanga we natwemanyisiza ngu n`obu okutandika kwabaire kutakabaireho, We akaba yaherize kumanya ebyo byona ebiikuza kubaho okugyendera kimwe okahika aha muheru. Kandi nangwa tekyo kyonka: Ruhanga akagaruka yakora entebekanisa kandi eyarikuhikiriza okugira ngu n`ogwe orikukirayo obukye abase kukyetegyereza: “ … Nkakigamba, kandi ndyakihikiriza, Nkakimariirira, kandi ndyakikora.” (Isaaya 6:11).

Okurugira kimwe aha shuura ya 40 nokweyongera omu maisho, entebekanisa ya Ruhanga y`okujuna nerangwa: “ … Iwe Sayuuni, orikuranga amakuru marungi, irooko otembe orushozi ruraingwa; iwe Yerusaalemu, ori kuranga amakuru marungi imutsya eiraka ryawe n`amaani; Rimutsye, orekyekutiina; ogambire endembo za Yuda oti, Reeba Ruhanga wanyu! Reeba MUKAMA Ruhanga naija n`amaani; Naategyekyesa omukono gwe; N`enzimuurano ye emwebembeire.” (Isaaya 40:6-10). Omu mazima, Ruhanga we wenka akeyizira kandi yaturetera okujunwa.

Okuruga ira naira tihariho orareebire Ruhanga: (Yohaana 1:18; 1 Timoseo 1:17), niwe wenka oine okufa, (1 Timoseo 6:16), owaizire arikuruga omubutahwaho bwe bw`obwijwiire bwomyoyo orikwera, omushana, hamwe n`amagara kandi yatambura arikurebwa omu kibanja Edeni.

Omu 1 Abagabe 22:13-24 kandi hamwe n`omuky`obusingye 18:12-22, Nabi Mikaaya akajurira ati; “ Nareeba MUKAMA ashutami aha kitebe kye, n`eihe ryona ery`omuiguru ryemereire aha rubaju rwe rwa buryo n`orwa bumosho.” (2 Eky`obusingye 18:18). Kandi yagaruka yahereza n`ebyarugire omukuganira okwabaireyo okwe.

Okurugira kimwe aha kutandika, Ruhanga akaba ayetoreirwe ba maraika abu yayegambireho omukutandika 1:26-28, “katuhangye omuntu…” N`abaana ba Ruhanga boona bakateera akaari k`okushemererwa Ruhanga kuyahangire ensi (Yobu 38:1-7). Abantu kubahindukire abagomi kandi bakeyombekyera omunaara ogwabaire nigwenda okuhikira kimwe omu iguru, Ruhanga akagambira ba maraika ati, “katushuume tuhindahindure orurimi rwabo, barekye kuhurirana.” (Okutandika 11:7).

Omu kutandika 18, MUKAMA akashendekyerezibwa ba maraika babiri obu yaza kutayayira omuhuuku we Aburahamu. Bombi bashatu, MUKAMA hamwe naba maraika babiri bakashobororwa okubabaire nibashushwa nka abantu (orunyiriri rwa 2). Aburahamu akanabisa ebigyere byabagyenyi ababeire nibaruga omu iguru, kandi yagaruka yaragiira ngu babaage omwana gw`ente kandi bagaruka babatekyere n`emigaati reero Aburahamu yabagaburira. Reero ba maraika babiri bo bagumizamu nibaza Sodomu (eshura ya 19), kwonka MUKAMA we yasigara na Aburahamu (Okutandika 18:22). Ba maraika nka Gaburyeeri, nibashobororwa okuba babaire bari nka abantu omu byahandikirwe ebirikwera (Danieli 8:15; 9:21), omuri Luka 1 maraika Gaburyeeri akemerera aha rubaju rwa buryo rw`eitambiro ry`okwotereraho obubane kandi maraika ogwe niwe omwe owagambire na Maria akaranga nokuzaarwa kw`omujuni (enyiriri 26-38).

Omuri Isaaya 6 nitushoma aha bintu by`amaani ebi nabi yarabiremu, owajuriire ati, “omu mwaka ogu omugabe Uziya yaafeereiremu, nkareeba MUKAMA ashutami aha kitebe ky`obukama, kiraingwa ekitairwe ahaiguru n`ebijwaro bye ebiragaize biijwire hekaru. Baaserafi beemereireahaiguru ye…” (enyiriri 1-3). “bwanyima naahurira eiraka rya MUKAMA naagira ati,Ntume oha kandi n`oha oraatugyendere? Ntyo naagarukamu nti: Ndi aha; ba niinye waatuma.“ (Isaaya 6:8). Eki nikirebwa butunu okurugira kimwe omukushoborora okwenyimaho ou Ruhanga yabaire namanyisa obu yagira ati “itwe.” MUKAMA akaba atuura ayetoreirwe ba maraika hamwe n`amahe garikuruga omu iguru, n`obu hakuba obuyareeta ebiragiro, ekirikworekwa gye omu byahandikirwe ebi: Ebyakozirwe entumwa 7:38+53; Abagalatia 3:19; Abaheburaayo 2:2. N`ahabw`ekyo, MUKAMA Ruhanga okurugira kimwe aha kutandika akabagira ati, “katuhangye omuntu omukishishani kyaitu…” Okuruga omu kutandika, Ruhanga akaba agamba naba maraika kandi agaruka agambira n`omu muntu.

Obu omucunguzi yazaarwa, ba maraika bakeshongora: “Ruhanga aheebwe ekitiinisa ahaiguru omu iguru…” (Luka 2:14). Okurugirira omuri Matayo 4:11, ba maraika bakahereza MUKAMA aha kugyezibwa kwe. Ba maraika babiri bakahamya okuzooka kwe (Luka 24:4). Ba maraika babiri bakaragura okugaruka kwa MUKAMA owazokire (Ebyakozirwe 1:9-11).

Nabi Ezekieli akikyirizibwa kureeba MUKAMA Ruhanga ari aha ngoma ye omukishishani ky`obuntu kandi yagaruka yamushobororaho omu bwijwiire: “Kandi ahaiguru y`ekirikushusha eiguru ekyabaire kiri aha mitwe yaabyo, hakaba hariho ekirikushusha ekitebe ky`obukama, nikishusha eibaare rya Safiro, kandi ahari ekyo ekirikushusha ekitebe ky`obukama hariho ekirikushusha omuntu nk`oku omuhanganzima gureebeka aha kicu aha izooba ry`enjura, nikwo okureebeka kw`okumurikana kwabaire kumwehinguririize. Ebyo bikaba biri ekishushani ky`ekitiinisa kya MUKAMA. Ku nakireebire, naagwa ahansi njumaire, naahurira eiraka ry`orikugamba.(Ezekieli 1:26+28).